Қазақстан Президенті "Ұрпақ теңдігі" жаһандық форумында үндеу жасады

Болат МӘЖИТ

ҚР Президенті баспасөз қызметі

ҚР Президенті Қасым-Жомарт Тоқаев БҰҰ аясында Франция және Мексика үкіметтерімен бірлесіп ұйымдастырған "Ұрпақ теңдігі" атты жаһандық форум қатысушыларына бейне үндеу жасады, деп хабарлайды ЭК Ақордаға сілтеме жасап.

Виртуалды форматта өткен жиын гендерлік теңдік мәселесі бойынша жаһандық күш-жігерді үйлестіруге арналған. Форумның негізгі мақсаты — барлық қатысушының нақты міндеттемелеріне негізделген көпжақты механизм қалыптастыру.

Мемлекет басшысы өз сөзінде Қазақстан Тәуелсіздік алғаннан бастап әйелдерді қолдауға бағытталған салиқалы саясатты жүргізіп келе жатқанын атап өтті.

— 2030 жылға дейінгі отбасы және гендерлік саясат тұжырымдамасын басты негізге алған берік құқықтық база қалыптастырдық. Өткен айда адам құқығына қатысты алдағы уақытта атқарылатын шаралар туралы Жарлыққа қол қойдым. Оның негізгі бағыттарының бірі — гендерлік теңдікті қамтамасыз ету. Гендерлік мәселені шешу — өңірлік өлшем бойынша еліміздің сыртқы саясаттағы басымдықтарының бірі, — деді Қасым-Жомарт Тоқаев.

Сонымен қатар Президент Қазақстанның "Гендерлік зорлық-зомбылыққа қарсы іс-қимыл коалициясы" және "Экономикалық әділдік пен құқық жөніндегі іс-қимыл коалициясы" сияқты екі серіктес бірлестікке қосылатынын мәлімдеді. Бұл мемлекеттің бірқатар міндеттеме қабылдағанын білдіреді.

Атап айтқанда әйелдер мен қыздарға қатысты зорлық-зомбылықтың таралуы туралы жалпыұлттық зерттеу жұмысын қолға алу жөнінде шешімін айтты.

Мемлекет басшысы гендерлік теңдікті қалыптастыру мен зорлық-зомбылықтың алдын алу бойынша озық тәжірибемен бөлісу үшін Орталық Азияда өңірлік білім платформасын құру туралы бастама көтерді.

Қасым-Жомарт Тоқаев БҰҰ және Еуропалық одақтың Орталық Азия мен Ауғанстанға арналған "Жарық сәулесі" өңірлік бастамасына инвестиция салуға дайын екенін атап өтті.

Сондай-ақ, Президент әйел кәсіпкерлерді қолдау үшін еліміздің барлық өңірінде ресурстық орталықтар құру жоспары туралы да айтты.

Мемлекет басшысы заңнамалық деңгейде қабылданып жатқан шаралар жайында айта келіп, әйелдер үшін тыйым салынған мамандықтар тізімін қайта қарауға, әйелдер мен балаларды әлеуметтік және құқықтық тұрғыдан қолдауды күшейтуге ниетті екенін жеткізді.

Қасым-Жомарт Тоқаев сөзінің соңында әйелдердің теңдігі мен қауіпсіздігін қорғауға, олардың құқықтары мен мүмкіндіктерін кеңейтуге бағытталған игі істі еліміздің толық қолдайтынын атап өтті.

    Ұсынамыз

    Пиксель для количества просмотров